ബെല്ലെവില്ലെ സിനഗോഗ് ആക്രമണശ്രമത്തിൽ നടുങ്ങി രാജ്യം: വൻ കൂട്ടക്കൊല തടഞ്ഞ് കനേഡിയൻ പോലീസ്

 

ഒൻ്റാരിയോയിലെ ബെല്ലെവില്ലെയിലുള്ള 'സൺസ് ഓഫ് ജാക്കബ്' സിനഗോഗിന്  നേരെ നടന്ന ഭീകരാക്രമണ ശ്രമം ഒഴിവായത് കനേഡിയൻ പോലീസിന്റെ സമയോചിത ഇടപെടലിലൂടെ.  ജൂതസമൂഹത്തിന്റെ ഏറ്റവും പവിത്രമായ യോം കിപ്പൂർ  പ്രാർത്ഥനാ വേളയിൽ പള്ളിയിലുണ്ടായിരുന്ന ഇരുപത്തഞ്ചോളം വിശ്വാസികളെ ലക്ഷ്യമിട്ട് തോക്കുമായി എത്തിയ അക്രമിയെ, പുറത്ത് ഡ്യൂട്ടിയിലുണ്ടായിരുന്ന കോൺസ്റ്റബിൾ ജെഫ് സ്മിത്ത് ജീവൻ പണയം വെച്ച് നേരിടുകയായിരുന്നു. 'നാഷണൽ പോസ്റ്റ്' റിപ്പോർട്ട് അനുസരിച്ച്, ഉദ്യോഗസ്ഥന്റെ അടിയന്തര പ്രതികരണം മാത്രമാണ് നിരപരാധികളായ പൗരന്മാരുടെ ജീവൻ രക്ഷിച്ചത്.

ഞായറാഴ്ച വൈകുന്നേരം നടന്ന സംഭവത്തിൽ അക്രമിയുടെ വെടിയേറ്റ് കോൺസ്റ്റബിൾ സ്മിത്തിന് ഗുരുതരമായി പരിക്കേറ്റെങ്കിലും, ആക്രമണം അദ്ദ്ദേഹം തടഞ്ഞു. പ്രാർത്ഥനകൾ നിശ്ചിത സമയത്തിലും പത്ത് മിനിറ്റോളം വൈകി ആരംഭിച്ചത് കൊണ്ടും, പള്ളിക്ക് പുറത്ത് വെടിവെയ്പ്പ് നടന്നതിനാലും മാത്രമാണ് ആരാധനാലയത്തിനുള്ളിൽ വലിയ രക്തച്ചൊരിച്ചിൽ ഒഴിവായത്. പള്ളിയുടെ പ്രധാന ജനൽച്ചില്ലകളിൽ ഇരുപതോളം വെടിയുണ്ടകൾ പതിച്ചത് അക്രമത്തിന്റെ വ്യാപ്തിയും ഭീകരതയും വ്യക്തമാക്കുന്നു.

കാനഡയിൽ അടുത്തകാലത്തായി ജൂതസമൂഹത്തിനും അവരുടെ ആരാധനാലയങ്ങൾക്കും നേരെ തുടർച്ചയായി ഉണ്ടാകുന്ന വംശീയ ആക്രമണങ്ങളുടെയും ഭീഷണികളുടെയും പശ്ചാത്തലത്തിലാണ് ഈ പുതിയ സംഭവം റിപ്പോർട്ട് ചെയ്യപ്പെട്ടത്. ഇത്തരത്തിലുള്ള തീവ്രവാദ നീക്കങ്ങളെയും അക്രമങ്ങളെയും മുൻകൂട്ടി തടയുന്നതിൽ സുരക്ഷാ ഏജൻസികൾ നേരിടുന്ന ഭരണപരമായ വീഴ്ചകളെക്കുറിച്ച് രാജ്യത്ത് രൂക്ഷമായ വിമർശനങ്ങൾ ഉയരുന്നുണ്ട്. വൻ ദുരന്തങ്ങൾ നിർണ്ണായക നിമിഷങ്ങളിൽ ഒഴിവാകുന്നത് പതിവാകുന്ന സാഹചര്യത്തിൽ, വർദ്ധിച്ചുവരുന്ന വംശീയ അധിക്ഷേപങ്ങൾക്കെതിരെ ശക്തമായ നിയമനിർമ്മാണവും കർശന സുരക്ഷാ പരിശോധനകളും നടപ്പിലാക്കാൻ സർക്കാർ തയ്യാറാകണമെന്ന ആവശ്യവും ശക്തമാകുന്നുണ്ട്